Пратениците под маски пристигнуваат на Конститутивната седница, на влезот им се мери температура

321
Фото: Маја Јаневска-Илиева

Конститутивната седница на новиот парламентарен состав се одржува под засилени мерки за заштита од коронавирус. Пратениците веќе почнаа да пристигнуваат во Собранието, каде задолжително е носење на маски и употреба на средства за дезинфекција, а на влезот им се мери температура пред да им биде дозволен влез во зградата на парламентот.

 

Поради неопходноста од одржување растојание меѓу пратениците, конститутивната седница ќе се одржи во Големата сала на Собранието, односно во салата позната како Големата купола. Гласањето ќе се одвива рачно, со картончиња.

 

Досегашниот претседател на Собранието Талат Џафери, кој беше хоспитализиран на Инфективната клиника во Скопје, вчера излезе од болница и рече дека ќе претседава со седницата.

Новинарите ја следат седницата на телевизорите во салите за медиуми, седнати на растојание.

 

Според Уставот, претседателот Стево Пендаровски е должен да му го довери мандатот за формирање влада на кандидатот на партијата или партиите што имаат мнозинство во Собранието. Мандатарот потоа има рок од 20 дена да формира влада. Ниту една партија го нема потребното мнозинство.

На предвремените парламентарни избори што се одржаа на 15 јули СДСМ освои 46 пратенички мандати, ВМРО-ДПМНЕ – 44, ДУИ – 15, коалицијата АА и Алтернативата – 12, Левицата два и еден ДПА.