Независни Грци до Коѕијас: Ние сме против употребата на терминот Македонија од соседната земја

174

За интервјуто на Коѕијас во германскиот весник Франкфуртер Алгемајне Цајтунг, реагира портпаролот на Независни Грци и објаснува дека ставот на владата официјално го изразува владиниот портпарол, а сè друго се лични проценки, јави дописничката на МИА од Атина.

 -Во прашањето за нацрт договорот од Преспа и за процесот на гласање, кога ќе дојде и ако дојде во грчкиот парламент, постоеше јасен став на владиниот портпарол. Било кој друг пристап изразува лични процени и во секој случај, секој треба да се ограничи на личните ставови. За позицијата на Независни Грци и на пратеничката група и понатаму не се преговара: никаква употреба на името на Македонија во името на соседната земја – вели Теодорос Тосунидис, портпаролот на Независни Грци во писмената изјава, како реакција за ставот на Коѕијас.

Како што веќе објави МИА, шефот на грчката дипломатија во интервјуто за ФАЗ говорејќи за процесот на гласање на Договорот во грчкиот парламент, рече дека ќе добие мнозинство гласови и дека е „точно дека Независни Грци нема да гласаат како партија, но постојат пратеници од оваа партија кои што сметаат дека е добар Договорот“.