Мицотакис: Меркел ги знае моите размислувања за Договорот од Преспа

113

Европската перспектива на земјите од Западен Балкан беше една од темите за кои вчера во Берлин разговараа германската канцеларка Ангела Меркел и грчкиот премиер Кирјакос Мицотакис.
Како што пренесоа агенциите, на прес-конференцијата по средбата Мицотакис го повторил својот став за Договорот од Преспа.

– Разговаравме за прашањата на Балканот. Канцеларката ги знае моите размислувања дека Договорот од Преспа е договор со сериозни мани, но мани што можат да се ублажат преку целокупната европска перспектива на Западен Балкан – изјави Мицотакис.
Меркел потврди дека станало збор за Балканот и за европерспективите на земјите од регионот.

– Разговаравме за прашањата за проширување на Европската Унија, односно за пристапните преговори на Србија и на Црна Гора, но и за иднината на пристапните преговори со Северна Македонија и со Албанија. Мислам дека овде констатираме низа заеднички аспекти што се однесуваат на нашите билатерални односи и би можеле да имаме успех – рече Меркел.

Мигрантското прашање и почитувањето на договорот ЕУ – Турција, инвестициите во енергетиката, заедничкиот план за зелен развој што ќе биде презентиран на почетокот на следната година, исто така, се меѓу темите за кои се зборувало во Берлин. П.Р.