И Јовановски побара изземање на Русковска, одложено судењето за „Меѓународен сојуз“

221

Судењето за „Меѓународен сојуз“ денеска беше одложено откако на барањето на Фросина Ременски за изземање на обвинителката Вилма Русковска се приклучи и Бојан Јовановски.

И Јовановски ја обвини Русковска за селективно и тенденциозно постапување. Поради барањата на обвинетите, судијката Софче Гаврилова-Ефремова го одложи денешното прво рочиште.

Јовановски рече дека Русковска извршила кривично дело тортура поради начинот на кој се однесувала кон него, а спомена и дека треба да биде изземена бидејќи постапувала во „Рекет“ каде што, како што додаде, била селективна со Зоран Милески-Кичеец кој е на слобода заради политички цели.

– Русковска го застапуваше предметот „Рекет“ тенмденциозно и селективно. Со нејзина согласност судот донесе одлука Кичеец да биде пуштен на слобода, бидејќи идат избори и заедно со Русковска треба да местат избори – рече Јовановски. 

За Русковска, барањето за нејзино изземање не е основано, и дека одлуката за тоа треба да ја донесе Јавното обвинителство.

– Никогаш не сум се однесувала пристрасно, во ниту еден предмет, а сум сработила можеби повеќе од 1.000 – изјави Русковска.

 Следното рочиште е закажано за 21 јули. Доколку Русковска не биде изземена од страна на републичкиот обвинител Љубомир Јовески, таа треба да ги даде воведните зборови, а во текот на судската постапка, Русковска рече дека очекува да ја докаже вината на обвинетите.

Првообвинет во „Меѓународен сојуз“ е Бојан Јовановски, а обвинети се и неговиот татко Миле Јовановски, потоа Јасна Мандиќ, Христина Блажевска и пратеничката Ременски. Тие се обвинети дека ги измамиле бизнисмените Силјан Мицески и Ардијан Амзоски дека ќе учествуваат во проект за изградба на домови за стари лица, при што им зеле над еден милион евра.