Иванов побара од премиерот да му ја достави документацијата за преговорите

188

Претседателот Ѓорге Иванов вчера побара од премиерот Зоран Заев да му ги достави предлогот за водење преговори со уставна основа, нацртот на договорот, како и ставовите на делегацијата во водењето на преговорите.
– Во недостиг на клучни документи, а со цел обезбедување поширок консензус за прашањето за името, претседателот на Република Македонија, Ѓорге Иванов, го охрабрува претседателот на Владата на Република Македонија, Зоран Заев, да ги достави предлогот за водење преговори со уставна основа, нацртот на договорот, како и ставовите на делегацијата во водењето на преговорите – се вели во соопштението од кабинетот на претседателот.

Иванов, како што истакнуваат од кабинетот, останува на ставот дека не прифаќа решение за прашањето за името за севкупна употреба.
– Ставот на претседателот Иванов дека не прифаќа решение за прашањето за името за севкупна употреба или ерга омнес е основен непроменлив принцип, што е во согласност со утврдената правна рамка за водење на разговорите за разликата околу името во рамките на Обединетите нации и во никој случај не е насочен против интеграцијата на Република Македонија во Европската Унија и во НАТО – се додава во соопштението.
Од кабинетот истакнуваат и дека претседателот Иванов укажува на потребата од постигнување национален консензус за надминување на разликата околу името и наоѓање решение што нема да го наруши достоинството на македонскиот народ и граѓаните. П.Р.