ВМРО-ДПМНЕ се подготвува за собирање на потписи против законот за попис

98

Опозициската ВМРО-ДПМНЕ ќе почне процедура за собирање на потписи со кои што ќе се бара поништување на законот за попис, ако власта, во меѓувреме, не го повлече законот. Од партијата велат дека се подготвуваат документи, кои треба да се поднесат до Министерството за правда за да може да се спроведе таа акција на терен.

Партискиот портпарол, Наум Стоилковски рече дека законот е без методологија и има индиции кои укажуваат дека тој нема да се спроведе како статистичка операција.

Одговарајќи на новинарски прашања, Стоилковски образложи дека акцијата за собирање на пописи би била спроведена преку подрачните единици на Министерството за правда, а луѓето ќе може да се потпишат во подрачните единици низ градовите.

– Бројот на потпишани нема да биде нешто за занемарување од страна на владејачкото мнозинство. И целта е тоа, да се повлече овој закон и да се донесе закон кој што ќе значи општествен консензус за статистичка операција – попис поддржан од сите – рече Стоилковски.

Прашан што е со електронската иницијатива за потписи, Стоилковски одговори дека тоа е уште еден начин на кревање на свесноста на населението и притоа уште еден начин за притисок врз власта во однос на овој закон кој значи спроведување на политички договор наместо на статистичка операција.