фото: Влада
Премиерот Димитар Ковачевски денеска се сретна со Патрициа Данци, генерална директорка на Швајцарската агенција за развој и соработка, придружувана од Вероник Улман Марти, амбасадорка на Швајцарската Конфедерација во нашата држава.

На состанокот, како што соопшти владината прес-служба, е најавено дека продолжува големата поддршка од Швајцарија во развојот на Македонија и силната и долгорочна соработка со нашата држава, што се реализира веќе речиси три децении.На средбата било разговарано за повеќе актуелни прашања, како што се последиците од војната во Украина, економската и политичката клима во државава, реализацијата на интеграциските перспективи.

Заеднички било констатирано дека решението за ситуацијата во Украина не е воена агресија, туку дијалог, како и дека случувањата во Украина рефлектираат економски и енергетски последици од светски карактер.

Премиерот Ковачевски се заблагодарил за големата и важна поддршка што ја дава Швајцарија на Македонија во суштински области за граѓаните и општеството, како што се животната средина, економијата, демократските процеси, политиките на еднаквост на сите граѓани.

Премиерот истакнал дека денеска Македонија се развива како демократско општество и како едно општество за сите граѓани, пример во регионот за заедничко живеење и функционирање.

Премиерот Ковачевски соопшти дека Владата , како и Владите во Европа и светот, е насочена кон надминување на предизвиците од светската економска и енергетска криза предизвикани од војната во Украина и од пандемијата и дека за таа цел постои тесна соработка и со премиерите и Владите во регионот.

– Фокусирани сме, на дневно ниво и кон стратешки политики во заштитата на животниот стандард на граѓаните, на ранливите категории граѓани, на ликвидноста на компаниите. Имаме историско покачување на минималната плата и покачување на пензиите, коешто годинава исто така ќе биде на историски највисоко ниво. Работиме на обезбедување на алтернативните извори на енергија и на обезбедување храна, преку антикризни мерки на спречување ценовни шокови, со коишто се соочува целиот свет. Предизвик и одговорност е да се води државата сега и затоа нема оправдување за несериозно однесување, како што се блокадите од несериозен политички субјект во Парламентот, што ги прави веќе 20-тина месеци, или предлозите за предвремени избори, коишто се од популистички карактер, а на штета на граѓаните и државата – нагласил премиерот Ковачевски.

Во однос на евроинтеграцискиот исчекор, Ковачевски соопштил дека нашата држава го има направено потребното, практикува и почитува европски вредности и е поставена принципиелно во развојот на добрососедските односи, со цел достоинствени решенија на отворените прашања.На средбата била изразена заедничка определба за натамошна соработка помеѓу Македонија и Швајцарската агенција за развој и соработка.