Европол поддржа меѓународна истрага за десетици илјади профили што поседувале и споделувале материјали за сексуална злоупотреба на деца на интернет.
Истрагата беше иницирана во 2019 година, по извештај од давател на онлајн услуги, кој посочи дека голем број престапници ја користеле платформата за размена на особено вознемирувачки слики од злоупотреба на деца, вклучувајќи и слики што прикажуваат садистички чинови на сексуална злоупотреба на доенчиња и деца.
Прегледот на информациите доведе до откривање на 32 GB датотеки, еквивалентна меморија неопходна за емитување видео од приближно 90 минути. До денес, меѓународната истрага доведе до отворање на 836 случаи на меѓународно ниво, апсење на 46 лица низ Нов Зеланд, идентификација на повеќе од 100 осомничени низ ЕУ и заштита на 146 деца низ светот. Оперативните активности доведоа до идентификација на корисници низ светот и оваа информација беше споделена со релевантните национални власти за понатамошни активности. Во два од случаите во Австрија и Унгарија, осомничените биле престапници што ги злоупотребувале сопствените деца, кои имале шест, односно осум години. Двете деца потоа беа заштитени. Друга истрага во Шпанија откри дека осомничениот поседувал и дистрибуирал материјал за сексуална експлоатација на деца, додека, исто така, снимал голи и сексуални слики на возрасни без нивна согласност. Голем број истраги сѐ уште се во тек низ ЕУ.
Во оваа акција, освен Европол и Интерпол, учествуваа земјите-членки на Европската Унија, Нов Зеланд, Австралија, Канада, Обединетото Кралство и САД.
