Полициски службеници од Одделот за криминалистичка полиција – Сектор за недозволена трговија со дрога, оружје и опасни материи, РЦ „Југ“ и Единицата за брзо распоредување во рамките на Одделот за специјални полициски операции, во полициска акција уапсија шест лица и запленија 67,5 кг марихуана, вредна речиси 200.000 евра.
„На 12.10.2021, во попладевните часови, од страна на полициските службеници во непосредна близина на граничниот премин Богородица, при обид нелегално да пренесат две торби со марихуана во количина од 67,5 кг, биле лишени од слобода Л. М. (44) и А. М. (36), двајцата албански државјани. Во рамките на истрагата беа обезбедени докази за инволвираност на уште 4 лица, од кои уште двајца албански државјани и двајца државјани на Република Северна Македонија.
Набргу потоа, во близина на с. Стојаково, лишен е од слобода Т. Х. (38) од Р. Албанија, а по извршен претрес во домот на В. Д. (41) од с. Стојаково, каде што бил затекнат и Е .Б. (29) од с. Попчево, Струмичко, од слобода биле лишени и овие две лица. Шестиот член на криминалната група А. К. (37), албански државјанин, кој беше во бегство, е лишен од слобода денеска околу 13.30 часот на подрачјето на Кичево“, соопшти МВР.
Од страна на МВР во текот на денешниот ден до Основното јавно обвинителство за гонење организиран криминал и корупција против шесте лица ќе биде поднесена пријава за сторено кривично дело по чл. 215 ст.3 од Кривичниот законик.
