Гостиварското Основно јавно обвинителство ќе почне истражна постапка против едно лице осомничено за кривично дело тешки дела против безбедноста на луѓето и имотот во сообраќајот.

Станува збор за сообраќајната несреќа што се случи на 4 септември, во која учествуваше осудениот Зоран Милески-Кичеец, кој управувал со автомобил „мерцедес“, а со него биле уште двајца српски државјани, кои се тешко повредени.

Во инцидентот имаше и еден загинат.

Како што објаснуваат од Обвинителството, на магистралниот пат Кичево – Гостивар осомничениот не се придржувал кон прописите и го загрозил јавниот сообраќај.

– Движејќи се со автомобил „мерцедес“ со кичевски регистарски ознаки, тој на критичното место не ја приспособил брзината на движење според состојбите и условите на патот и на видно обележана полна надолжна линија почнал престигнување на возилото пред него – автомобил „бмв“ со тетовски регистарски ознаки. Во истиот момент во спротивна насока кон Кичево се движел автомобил „санг јонг“ со гостиварски ознаки, на кое осомничениот му го попречил патот, па директно удрил со предниот десен дел од „мерцедесот“ во предниот десен дел од автомобилот „санг јонг“. Удреното возило со левиот страничен дел, пак, удрило и во автомобилот „бмв“, кој бил престигнуван – се наведува во соопштението од Обвинителството.

Во несреќата животот го загубил сопатник во автомобилот „санг јонг“, четири лица добиле тешки повреди, а тројца, меѓу кои и осомничениот, добиле телесни повреди.

Поради опасност од бегство, можност за влијание врз сведоците/оштетените и можност за повторување на делото, јавниот обвинител до судија на претходна постапка доставил предлог за определување мерка притвор за осомничениот.​

Од Управата за извршување санкции соопштија дека осудениот Зоран Милески бил ослободен од затвор 30 дена, до 9 септември, за да направи испитувања поради влошена здравствена состојба.