Во продолжението од сведочењето на премиерот Зоран Заев во случајот „Таргет Тврдина”, прашање му постави ексминистерката за внатрешни работи, Гордана Јанкулоска. Таа го праша Заев врз основа на неговото сведочење, дали е точно дека за некои периоди немаат добивано бомби и материјали во партијата.

Заев рече дека имало денови кога воопшто не добивале материјали и разговори во партијата.

-Не објавивме ништо за А1 телевизија, бидејќи во тој период имаше празнина во денови, односно не ни беа доставени материјали и разговори. Пример од 1 до 17 во месецот, се гледа дека 18, 19, 24 во месецот воопшто нема материјали – рече Заев.

Тој дополни дека било невозможно да се земат сите прислушувани материјали.

Мијалков и останатите обвинети бараа одлагање на рочиштето за да се подготват за вкрстено испитување, но тоа не им беше одобрено. На следното рочиште ќе бидат испитани двајца сведоци.

Досега како сведоци во предметот беа сослушани инженерите во поранешното УБК, Ѓорѓи Лазаревски, Звонко Костовски, Сашо Трајковски и поранешниот разузнавач, Зоран Верушевски.

Обвинети се 12 лица, меѓу кои поранешниот началник на Петтата управа во МВР, Горан Грујевски и вработениот во УБК Никола Бошкоски, кои избегаа во Грција, ексминистерката за внатрешни работи, Гордана Јанкулоска, поранешниот директор на УБК Сашо Мијалков, и тогашниот шеф на неговиот кабинет, Тони Јакимовски.

Обвинетата Елена Џиланова призна вина и доби условна казна затвор. Првото рочиште за предметот се одржа на 22 декември 2017 година.

Според обвинението, преку три системи за следење на комуникациите во УБК, во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби.