Дваесет и тригодишен битолчанец заработи кривична пријава за фалсификување пари, откако во неколку наврати пуштил во оптек фалсификувани банкноти од по 500 евра.
Според податоците од Министерството за внатрешни работи, на 20-ти месецов, Единицата за финансиски криминал при Одделот за сузбивање организиран и сериозен криминал во рамките на БЈБ поднесе кривична пријава до Основното јавно обвинителство – Скопје против З.Т. (23) од Битола, поради основано сомнение дека е сторител на кривичното дело „фалсификување пари“, предвидено и казниво по членот 268, во врска со членот 45 од Кривичниот законик.
– Пријавениот во текот на 2021 година набавил лажни пари, и тоа вкупно 25 фалсификувани банкноти во апоени од по 500 евра, за кои знаел дека се фалсификувани, со намера да ги пушти во оптек како вистински. На 15.6.2021, З.Т. најпрво пуштил во промет пет фалсификувани банкноти од по 500 евра во филијала на банка во Скопје, без да бидат забележани од страна на вработениот во банката дека се фалсификат, по што на 17.6.2021 повторно пуштил во промет 20 фалсификувани банкноти од по 500 евра, во истата банка.
Со ова, пријавениот З.Т. пуштил во промет вкупно 12.500 фалсификувани евра, со што се стекнал со противправна имотна корист во вредност од 766.250 денари, на штета на банката, со што ги извршил кривичните дела „фалсификување пари“, предвидено и казниво по членот 268, во врска со членот 45 „продолжено кривично дело“ од Кривичниот законик – информираат од МВР.
