Јовановски: Се чувствувам понижено и како политички затвореник

374

Бојан Јовановски, обвинет во случајот „Рекет“, пред судот посочи дека тој се гледа себеси како политички затвореник и кажа дека пријавил закани за негова ликвидација кај обвинителката Вилма Русковска.

– Неопходна обврска ми е да ве известам за мојата состојба. Прва околност е мојата лоша здравствена состојба. Го молам судот да ги цени околностите на здравствената состојба. Нееднаква е мојата положба пред Уставот. Јас се чуствувам понижено. Јас ги пријавив кај Русковска заканите за моја ликвидација. Сакам да го известам судот дека се чувствувам како политички затвореник, бидејќи „Рекет“ сè повеќе личи на арена на политичките чинители. Вистината за случајот ќе се дознае само ако има неселективност – рече Јовановски.

Тој на судот му предочи дека ако во предметот „Рекет” се постапува политички, за што тој имал информации, тогаш ќе штрајкува со глад.

– Доколку судот постапува политички, јас ќе штрајкувам со глад како најрадикална мерка која согласно здравствената состојба, на крајот може да биде со фатални последици. Го молам судот да носи одлуки без притисоци и закани – посочи Јовановски.

Тој кажа дека испратил писма до неколку амбасадори, од кои побарал да го посетат во затворот. Јовановски смета дека судот селективно ја цени неговата здравствена состојба.

– На кого му пречи вистината за „Рекет“ и кој сака моја физичка ликвидација. Денес испратив лични писма до амбасадата на САД, до Самоил Жбогар, до Тимоние, до Хелсиншкиот комитет, побарав нивна посета во затворот „Скопје“ поради чувството на дискриминација – рече Јовановски.