Стефанова: Јанева се однесуваше како да е адвокат на Панделески

419

Обвинителката Лиле Стефанова на денешното сведочење за случајот „Рекет” рече дека ексшефицата на СЈО Катица Јанева телефонски и се заканувала дека ќе ѝ прати дома новинари. Стефанова дополни дека исто така и забранувала да ги коментира снимките објавени во италијанскиот весник „Ла верита”.

– Последно нешто што направи е ургенцијата да му се одмрзне имотот на Панделески. Се однесуваше како да е негов адвокат! – рече таа.

Стефанова додаде дека по тоа Јанева дала оставка и оттогаш се немаат сретнато.

– Еднаш ми се јави и рече дека треба да ги закопаме секирите, да ја смириме топката, но тогаш веќе сè беше завршено – рече Стефанова.

Таа вели дека Јанева секогаш повеќе ургирала за Панделески отколку за Камчев.

– Бојан Јовановски не го познавам лично. Ми кажуваа само дека си доаѓа во СЈО, дека автомобилот си го паркира на нашиот паркинг, дека не му се врши претрес на влезот, но тоа само го слушав од други – вели Стефанова.

Во моментов почнува вкрстеното испитување на обвинителката Лиле Стефанова како сведок за случајот „Рекет”.

Најголемо изненадување во судницата настана кога адвокатот на Бојан Јовановски, Сашо Дуковски, ја праша Стефанова кои биле емисарите преку кои ургирал Камчев и која судијка била меѓу нив.

На ова, Стефанова одговори дека судијката Добрила Кацарска била присутна од рано утрото до доцна вечерта кога се одлучувало за притворот на бизнисменот Камчев, иако не била судија на претходна постапка во предметот.