Промената на судечкиот совет го врати „Монструм“ на почеток

76

Судењето за петкратното убиство кај Смилковско Езеро на 12 април 2012 година, „Монструм“, се враќа од почеток, заради промена на судечкиот совет, но само формално со пренесување на сите досегашни изјави и изведени докази во новиот записник. На тој начин расправата продолжи од каде што претходно застана.

Заради промена на судечкиот совет, односно поднесена оставка на еден судија – поротник, а во брзо време и истек на мандат на друг судија-поротник, со назначување нови како и дополнителни – резервни поротници, главната расправа формално почна одново, а продолжи со изведување нови докази, како што информираат од Основниот кривичен суд во Скопје.

Одбраната се согласи наместо повторно изведување на доказите, судењето да почне формално од почеток, само со пренесување на сите досегашни изјави и изведени докази во новиот записник. Така, расправата продолжи онаму каде и претходно застана – со изведување на нови докази и сослушување нови сведоци, заради ефикасност на постапката, начелото за судење во разумен рок и пред се, уставно загрантираните права и обврски на обвинетите и оштетните во постапката.

Судот не дозволи дополнително одолговлекување на постапката, во согласност со одбраната, а постапувајќи според законските одредби, што е од интерес, пред се, на обвинетите и оштетените во предметот.

Случајот „Монструм“ го води судијата Огнен Ставрев, а застапници на обвинението се Фатиме Фетаи и Гаврил Бубевски.

За петкратното убиство на 12 април 2012 година, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски, во претходна постапка за случајот на доживотен затвор беа осудени Алил Демири, Африм и Агим Исмаиловиќ, Езим и Хаки Азири и Сами Љута.

Врховниот суд во декември 2017 година ги укина пресудите, ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири и им определи мерки на претпазливост. По укинувањето на пресудите, случајот „Монструм“ го презеде СЈО и предметот беше вратен на повторно судење.