Во сите центри за јавно здравје во земјава, денеска почнува вакцинацијата против сезонски грип. Годинава се обезбедени 41.000 дози вакцини, изјави викендов на прес-конференција министерот за здравство Венко Филипче. Првпат годинава, како што посочи тој, Министерството набави 28.000 дози вакцини, кои се бесплатни за лицата над 65 години со пензија помала од 14.480 денари, односно со просечна и потпросечна пензија, како и за оние што немаат пензија.

– Набавивме четиривалентна вакцина, која е најнова, висококвалитетна, и заштитува од четири видови инфлуенца и таа е според препораките на Светската здравствена организација и Европската медицинска агенција. Вакцините се набавени од француската фармацевтска компанија „Санофи Пастер“. Годинава им помагаме на граѓаните на кои им е најмногу потребна вакцината. Вакцинацијата не е задолжителна, но ја препорачуваме за лица над 65 години, како и за другите со хронични болести, но и за здравствените работници и за други лица во здравствен ризик – истакна министерот Филипче.

Оваа година сите пензионери над 65 години со просечна и со потпросечна пензија, со чек од својата пензија треба да одат кај матичниот лекар, кој, пак, преку „Мој термин“ ќе им закаже термин за вакцинација во некој од центрите за јавно здравје. Пензионерите над 65 години што не земаат пензија, ќе можат да се вакцинираат со потврда од ПИОМ.

Сите други лица, кои сакаат да се вакцинираат, како што велат од ресорното министерство, тоа можат да го направат во центрите за јавно здравје без закажување. Станува збор за 13.000 дози што ги набавија центрите за јавно здравје, а цената за нив е 650 денари. Министерството за здравство, како што посочуваат оттаму, при набавката постигна најниска цена на чинење со што заштеди околу 75.000 евра. П.Р.