Министерот за животна средина Насер Нуредини денеска се обрати на првата сесија од Неформалниот состанок на министрите за животна средина на ЕУ во Љубљана, посветена на меѓународните климатски преговори и патот до COP26, при што ја презентираше зголемената национално определена амбиција за редукција на емисиите на стакленичките гасови за 51 отсто до 2030 во споредба со 1991, односно нето-редукција од 82 отсто.

Притоа, Нуредини ја истакна потребата за поддршка од страна на развиените земји за постигнување одржлив развој на помалите економии и ранливите држави како нашата, особено од аспект на постигнување праведна енергетска транзиција, јакнење на човековите капацитети и градење  инфраструктура.

На денешната сесија на ЕУ министрите за животна средина, на која беа поканети и земјите кандидати за членство, се разговараше за одржувањето на лидерската позиција на ЕУ во климатската акција и се преговараше за преземање на соодветните чекори за овозможување на успешна конференција на земјите членки на Рамковната конвенција за климатски промени во Глазгов, како и конечна операционализација на Договорот од Париз.