Македонците се придружија на твитер-кампањата за „пристап“ до милијардите на Илон Маск, меѓу бројните барања за помош и инвестиции од целиот свет кои пристигнуваат до американскиот претприемач преку социјалната мрежа. Македонските корисници на Твитер се обидуваат да го „натераат“ Маск да инвестира во соларни панели во државава, оставајќи му досетливи пораки.
„Еј Илон Маск, само што слушнав некои луѓе како велат оти нема шанса да и помогнеш на Македонија да набави соларни панели. Кажаа дека не си способен“, „Тој би можел да биде херој за Македонија на рамништето на Александар Македонски, но можеби нема потенцијал за овој потфат“, „Доколку ја прекриеме целата површина на Македонија со соларни панели, би можеле да обезбедиме електрична енергија за половина од светските држави. Замислете ги можностите“, „Ова е одлична идеја. Се надевам дека Илон Маск ќе го прочита овој твит. Македонија е земја со 300 сончеви денови“, гласат дел од твитовите упатени до Маск.
This is a great idea, I hope that @elonmusk will read this tweet, Macedonia is country with 300 sunny days
— #ST (@papa_sveto) July 12, 2018
За ваквиот тренд придонесе вклучувањето на Маск во спасувачката акција за ослободување на момчињата од пештерата Там Луанг во Тајланд, откако корисник на Твитер побарал помош од него. Богатиот Американец преку Твитер даваше известувања за неговиот обид за конструкција на мини-подморница која ќе ги спаси Тајланѓаните, но, додека го достави неговиот изум до пештерата, спасувачките екипи веќе почнаа да ги извлекуваат децата, користејќи јаже. Надлежните лица во Тајланд истакнаа дека опремата што ја доставил Маск не може да биде од корист во спасувачката акција.
Just returned from Cave 3. Mini-sub is ready if needed. It is made of rocket parts & named Wild Boar after kids’ soccer team. Leaving here in case it may be useful in the future. Thailand is so beautiful. pic.twitter.com/EHNh8ydaTT
— Elon Musk (@elonmusk) July 9, 2018
Маск потоа се соочи со бројни обвинувања на социјалните мрежи оти се вклучил во акцијата бидејќи станувало збор за медиумски атрактивна приказна што ја следи целиот свет, додека во Флинт, САД, веќе траела криза за вода. Тоа резултираше со одговор од директорот на компаниите „Тесла“ и „Спејс екс“ оти тој ќе ја финансира поправката на сите домови во Флинт.
Британскиот весник „Гардијан“ ја опиша ситуацијата со барањето на помош од претприемачот на сатиричен начин, во написот со наслов „Сакате да ги поделите милионите на Маск? Само твитајте му“.
– Тој прати бескорисна подморница на заробените тајландски деца и вети дека ќе обезбеди чиста вода за жителите на Флинт. Еве како да го натерате да ги испразни џебовите – пишува Гардијан.
Богатството на Маск се проценува на 20 милијарди долари, според податоците на магазинот „Форбс“. Останува да се види дали Американецот ќе одговори на македонските барања за инвестиции. М.Ж.
