Влегуваме во последната фаза од пописните активности на терен, во која се привршуваат сите активности што се спроведуваа во последните 20 дена. Апелираме до граѓаните да бидат трпеливи. Пописот трае до 30 септември и уверуваме дека никој нема да биде пропуштен или изоставен од овој процес, изјави Јасмина Ѓоргиева од Државниот завод за статистика.

Токму од овие причини, додаде таа, Државниот завод за статистика ќе им овозможи на сите оние граѓани, кои по кој и да е основ не успеале да остварат контакт со попишувачот, кој поминал во нивниот пописен круг, но не ги нашол, да може да се попишат на одредени локации во својата општина.

Ѓоргиева посочи дека попладнево на веб-страницата popis2021.stat.gov.mk ќе бидат објавени локациите во сите општини и каде граѓаните ќе може да појдат и да се попишат.

Таа повика граѓаните да бидат трпеливи бидејќи пописот трае до 30 септември и некои граѓани ќе бидат посетени и на последниот ден. Таа изрази уверување дека никој нема да биде пропуштен или изоставен од овој огромен статистички процес бидејќи целта на пописот е целосен опфат на сите граѓани што во моментот живеат во Македонија.

Заклучно до денеска во 12 часот попишани се вкупно 1.395.000 граѓани, над 435.000 домаќинства и над 600.000 станови, а самопопишани се 195.477 граѓани од дијаспората.