Сите земји од Западен Балкан од четврток ќе бидат на епидемиолошката зелена листа на Австрија.
Како што е најавено во Виена, со уредбата што ќе стапи во сила в четврток, 8 јули, граѓаните на сите земји од Западен Балкан ќе може да влезат во Австрија.
Досега само Србија и Македонија, како и Албанија, беа на зелената листа, а сега се и Босна и Херцеговина, Црна Гора и Косово.
Патниците што доаѓаат од зелените земји ќе може да влезат во Австрија без карантин доколку имаат потврда за вакцинација, со вакцини признати од Европската агенција за лекови (ЕМА) – од „Фајзер“, „Модерна“, „Астра зенека“ и од „Џонсон и Џонсон“ и од Светската здравствена организација (СЗО) – кинеските на „Синофарм“ и на „Синовак“.
Оние што немаат потврда за вакцинација мора да имаат потврда за прележан ковид-19, негативен ПЦР или антиген-тест.
Патниците што доаѓаат од земјите на зелената листа не мора да пополнуваат електронска регистрација пред патувањето.
Со новата уредба Русија е вклучена меѓу земјите во кои се шири нов вид на вирусот поради што, секој што ќе дојде во Австрија, по престојот во таа земја, ќе мора да биде ставен во карантин.
Ова веќе важи за Велика Британија, Бразил, Индија и за Јужна Африка.
