Политичарите го честитаа Рамазан-бајрам

70

Ахмети: Да се молиме еден за друг и да го надминеме овој предизвик што поскоро

Претседателот на ДУИ, Али Ахмети упати честитки за големиот празник Рамазан Бајрам со најискрени желби за прифатен пост и молитви, здравје, среќа и благосостојба во семејствата.

„Денешниот празник доаѓа по светиот месец на постење и претставува прослава на хуманоста, на подавање рака, на грижата, на обединувањето, солидарноста преку вербата во Бога.

Во овие тешки и непредвидливи времиња, да бидеме повнимателни и да се молиме еден за друг и за човештвото воопшто за да го надминеме овој предизвик што е можно поскоро и полесно, и да се вратиме заедно во нормалноста и животот каков што го знаеме и сакаме.

Посакувам овие празнични денови да ги поминете со своите најсакани, да се сакаме, почитуваме, грижиме и помагаме еден со друг рефлектирајќи кон општото добро со верба во Господ“, се вели во честитката.


Заев: Празничните денови поминете ги во мир, љубов, спокојство и меѓусебно разбирање

„Празникот на Фитер Бајрам како еден од најзначајните датуми во Исламскиот календар, го означува крајот на светиот месец Рамазан. Духот и патот на верникот е тесно поврзан со прочистување на душата и мислата преку молитви, храброста да му се спротивставува на злото, насилството, злоупотребата, нарушувањето и уништувањето на чистите вредности“, се вели во честитката на претседателот на СДСМ, Зоран Заев по повод верскиот празник Фитер Бајрам.

„Во текот на овој месец, поминавте низ големи искушенија и предизвици оставајќи ги на страна сите лични потребни и суети, со цел приближување и возвишување кон семоќниот Господ. Иако годинава месецот Рамазан беше проследен преку бројни мерки и рестрикции како резултат на глобалната пандемија на Коронавирусот, вие пак достоиствено издрживте и ја исполнивте оваа годишна обврска која што во Исламот е една од главните столбови на верата.

Како значајни политички чинители во општеството, водиме грижа и преземаме максимална одговорност кон зачувување на здравјето, достоинството и благосостојбата на сите наши граѓани. Преку воспоставување на професионалност, независност и демократизација на државните институции, нашата земја заедно со вас со сигурни чекори ги реализира своите аспирации и определби кон европското семејство, каде што припаѓаме.

Почитувани сограѓани, верници од Исламската вероисповед, во име на Социјалдемократскиот сојуз на Македонија, како и во мое лично име Ви го честитам големиот празник Фитер Бајрам. Ви посакувам овие празнични денови да ги поминете со вашите најблиски и најсакани, во мир, лубов, спокојство и меѓусебно разбирање“, се додава во четитката.


Мицкоски: Традицијата не обединува, треба да градиме заедничка иднина за Македонија

Претседателот на ВМРО-ДПМНЕ, Христијан Мицкоски до верниците од исламска вероисповед испрати честитка за празникот Рамазан Бајрам.

„Ви посакувам добро здравје, среќа, мир и благосостојба во вашите домови. Денешниот празник не учи на хуманост, меѓусебно помагање и почит еден кон друг. Традицијата е она што не обединува, а не што не разделува, со векови христијаните и муслиманите живееле на овие простори и заеднички празнувале, се радувале, но и тагувале. Треба и да продолжиме понатаму градејќи заедничка иднина за Македонија.

Само заедно и сплотени можеме да изградиме држава во која нашите деца ќе сакаат да живеат, наместо среќата да ја бараат што подалеку од своето родно огниште.

Живееме во тешки времиња кога целиот свет се справува со светска пандемија, сите граѓани без разлика на верската и етничката припадност го споделуваат тешкиот живот. Покрај здравствената криза имаме и тешка економска криза, и силна ерозија на моралните вредности. Живееме во време кога правдата не е достижна, кога власта е прва во рекетот, наместо справување со него, кога наместо едно општество за сите, прави поделби, внесува раздор и прави дискриминација. Делиме исти маки, исти проблеми, една заедничка судбина, и затоа одлуките ќе ги донесеме заеднички и заеднички ќе се избориме за обнова и подобра иднина“, се вели во честитката.


Џафери: Имајте верба, имајте трпение, бидете силни и останете дома

Ми претставува голема чест и задоволство да од мое лично име и од име на Собранието, на сите верници кои денес го слават големиот празник Фитер Бајрам кој што е круна на светиот месец Рамазан, да им упатам искрени честитки за добро здравје, бериќет и мир во душите и домовите.

Се надевам дека овој Бајрам кој што како и претходно месецот на пост и солидарност го прославуваме на невообичаен начин, далеку од верските храмови, сепак блиску до нашите најдраги и најблиски членови на семејството, ќе ни донесе искрени и убави мисли упатени до целото човештво за што побрзо и побезболно пребродување на овој предизвик кој што како што реков и во претходната Рамазанска честитка, не бира ниту вера, ниту нација, ниту богати или сиромашни, мажи или жени. Нека даровите на Рамазан Бајрам, солидарноста, заемната почит и разбирање, милоста и опростувањето бидат дарови кои ќе го збогатуваат нашето секојдневие.Почитувани мои, имајте верба, имајте трпение, бидете силни и останете дома со своите блиски. Верата се носи во срцето а домот е вашиот храм, нека е честит Фитер Бајрам, се вели во честитката на претседателот на Собранието, Талат Џафери.


Спасовски: Заедно ќе успееме да ги пребродиме последиците од кризата

Во име на Владата, техничкиот премиер Оливер Спасовски, им го честита на сите граѓани од исламска вероисповед празникот Рамазан Бајрам. Видео-обраќањето на премиерот Спасовски го пренесуваме во целост.

„На сите припадници на Исламската вероисповед во нашата земја, во мое, и во име на Владата на Северна Македонија, упатувам најискрени честитки по повод големиот муслимански верски празник Рамазан Бајрам.Оваа година Рамазан Бајрам, како празник на обновата на духовната сила којашто ја зајакнува вербата на луѓето во доброто, вистината, правдата и поттикнува желба за меѓусебна почит, разбирање, солидарност, има посебно значење заради актуелната здравствено-економска криза предизвикана од пандемијата на ковид-19.

Светиот месец Рамазан е најблагородниот и најсреќниот месец за граѓаните од исламската вероисповед.Крајот на постот и дарбите што се стекнуваат за време на месецот на одрекувањето и воздржувањето, ги украсуваат верниците со дух на трпение, несебичност и дарежливост за да се споделат благодатите на празникот со членовите на семејствата, роднините, пријателите и соседи.

Во овие услови, Рамазан Бајрам не повикува да се соочиме со предизвиците, кои ги носи оваа глобална здравствено-економска криза и врз начелата на почитување и солидарност да продолжиме заедно по патот што го избравме, здружено и единствени.Градиме заедно едно општество за сите граѓани, со еднакви шанси за секој и знам дека само заедно ќе успееме најбрзо и најбезболно да ги пребродиме сите, па и овие последиците од кризата.

Во духот на празникот Рамазан Бајрам како одговорни граѓани кон себе, кон своето семејство и кон државата, да ги почитуваме препораките за предострожност и заштита со носење на заштитна опрема и за одржување безбедна физичка дистанца. Оваа година да прифатиме дека со почитувањето на здравствените безбедносни препораки ќе се заштитиме себе си, нашите блиски и сите околу нас.На крајот дозволете ми да ви посакам празничните денови да ги поминете во радост и спокојството на домот, во добро здравје и духовна сила“, се вели во честитката.