Петиција до Европскиот совет да не го одложува почетокот на преговорите со Скопје и Тирана

227

Повеќе од 80 невладини организации од Западен Балкан упатија петиција до претседателот на Европскиот совет, Доналд Туск, во која телото на ЕУ се повикува да не го одложува почетокот на преговорите за членство на Македонија и Албанија во Унијата.

Во петицијата, како што пренесе новинската агенција „Бета“, се изразува загиженост дека одложувањето би можело негативно да влијае на проевропскиот став на жителите на целиот регион, на кредибилитетот на Европската Унија и да ги обесхрабри политичките елити во регионот при решавањето на други важни билатерални спорови.

– Невладините организации од Западен Балкан изразуваат надеж и очекување на Европскиот совет ќе ги исполни очекувањата за отворање на пристапните преговори со Македонија и Албанија во јуни – се наведува во петицијата.

Невладините сметаат дека добрососедските односи се едни од клучните фактори за консолидација на Западен Балкан и неговата брза интеграција во ЕУ, се вели во петицијата.

– Високо ги цениме храброста и упорноста на лидерите на Македонија и Грција и примерот за решавање на отворените билатерални прашања кој го поставија. Веруваме дека тоа ќе придонесе кон решавањето на други спорови во регионот и ќе донесе стабилност и европска иднина за сите нас – стои во петицијата.

Петицијата ја потпишале 85 невладини организации, меѓу кои Европското движење во Србија, во Црна Гора и во Македонија, Фондацијата Отворено општетство од Србија и Албанија, Иницијативата млади за човекови права од Србија, Косово, Црна Гора и Босна и Херцеговина, Хелсиншкиот комитет за човекови права во Србија, Белградскиот центар за човекови права, Белградскиот центар за безбедносна политика и Центарот за европска политика.