Онлајн-медиуми со многу низок квалитет

53

Советот за етика во медиумите на Македонија (СЕММ), Здружението на новинарите на Македонија (ЗНМ) и Самостојниот синдикат на новинарите и медиумските работници (ССНМ) во заедничко соопштение наведуваат дека, соочени со злоупотребата на медиумите што им служат на деструктивни агенди на поединци и групи, итно бараат од нив да ги задоволат основните правила за професионална работа, вклучувајќи почитување на Кодексот на новинарите, транспарентност во сопственичката и уредувачката структура, како и прифаќање на саморегулацијата како единствен заштитник на медиумските слободи и независност.
Ова вклучува и наведување на авторството, како и на изворите на информации кога се преземаат содржини од други медиуми.

– Право на секој медиум е да одлучи дали ќе учествува во работата на саморегулативното тело – Советот за етика во медиумите на Македонија, но тоа не ги ослободува од обврската да ги почитуваат професионалните стандарди во медиумската сфера. Ова се минималните стандарди што се очекува да бидат исполнети од страна на медиумите, во спротивно тие единствено ќе се сметаат за парамедиуми, кои работат на штета на јавниот интерес. Загрижени сме што довербата на јавноста во медиумите честопати е изневерувана од поединци и медиумски платформи што работат неодговорно и на штета на јавниот интерес, доведувајќи го со тоа во прашање интегритетот на професијата – истакнуваат од СЕММ, ЗНМ и ССНМ.

Тие посочуваат дека ваквите негативни појави најчесто ги има на платформите на онлајн-медиумите, каде што се наоѓаат содржини со многу низок квалитет, лажни вести, дезинформации, пропаганда и сензационализам.