Немањето анестезиолог го остави Кичево без првороденче во новата година

333

Поради немање анестезиолог што би асистирал во првото годинешно породување во кичевската болница, среќната мајка мораше да отпатува за Охрид, каде што е извршено породувањето. Инаку, ова не е прв случај родилки во поодмината бременост да се препраќаат во други градови поради дефицит од анестезиолози во кичевската болница, проблем што со години се провлекува во оваа здравствена установа.

– Денеска ќе беше извршено првото породување во нашата болница во оваа календарска година, но немањето анестезиолог нѐ принуди на идната мајка да ѝ дадеме упат и таа породувањето да го изврши во охридската болница. Поради дефицит од анестезиолози во нашата болница, најмалку педесетина породувања во текот на годината се помалку во нашиот оддел, а овој проблем ќе нѐ следи сѐ додека целосно не се екипира оваа здравствена установа. Инаку, за ваша информација, од година на година бројот на новороденчиња во нашата болница е во опаѓање, така што во 2010 година имавме 420 породувања, додека во изминатава година тој број е речиси преполовен и изнесува 230. Причините за ова намалување на бројот на новороденчиња се должат на иселувањето на младите во фертилниот период, како и на горенаведениот проблем, односно на немањето доволно анестезиолози во нашата болница – истакна д-р Ѓоко Дичоски, гинеколог-акушер во кичевската општа болница. Кичевската болница располага со еден анестезиолог, а во неа се лекуваат околу 70. 000 жители од Кичево, Пласница и од Македонски Брод.