Модерен контролен центар за безбедност на автопатот Демир Капија – Смоквица

483

Безбедноста на сообраќајот на автопатот Демир Капија – Смоквица и на двата тунела, што се пуштаат денеска во употреба ќе се следи преку Контролниот центар кај Неготино. Со 24-часовен видео надзор се покриени тунелите на автопатот преку кои до возачите ќе стасуваат предупредувања во случај на сообраќајки, дефекти во системот, евентуално затворање на сообраќајот…

Во двата тунела се инсталирани 64 камери. Центарот обединува четири посебни системи преку кои меѓу останатото на возачите ќе им стасуваат потребните известувања со автоматско вклучување преку фреквенцијата на радијата во автомобилите. Ќе се мери брзината на движење, густината на сообраќајот, издувните гасови…

Покрај софистицираната опрема со камера за видео надзор и безбедност, достапни ќе бидат и противпожарна и шлеп служба. Во Контролниот центар се ангажирани 17 лица, односно по четворица советници за контрола на сообраќајот и ЕСКАДА контролори, како и осум техничари. Следењето на сообраќајот преку Контролниот центар во иднина ќе се прошири на целиот потег од Велес до Гевгелија.

Ова е прв Контролен центар на автопатите во Македонија. Ваков Центар ќе има и кај Петровец за контрола и управување на сообраќајот од Табановце до Велес, а планирано е да се изгради и на автопатот Кичево – Охрид. Сите контролни центри ќе бидат интегрирани во заеднички Контролен пункт лоциран кај Петровец.

Контролниот центар на новата автопатска делница беше изграден по анексот на договорот за изградба за автопатот во октомври лани, со кој беа опфатени и градежните зафати за дислоцирање на далновод на МЕПСО. Центарот и далноводот беа клучните причини за продолжувањето на активностите на терен.

Со пуштањето во употреба на автопатската делница од Демир Капија до Смоквица во должина од 28,2 километри се заокружува со целосно автопатското решение – Коридорот 10 низ територија на Македонија. Инвестицијата изнесува 270 милиони евара.

На пуштањето на автопатот ќе присуствуваат премиерот Зоран Заев, министерот за транспорт и врски Горан Сугарески и директорот на Директоратот за проширување во Европската комисија, Кристијан Даниелсон.