Во Битола одбележана годишнина од холокаустот на Евреите

168

Високи гости од државата и странство, амбасадори и конзули, владини министри, претставници на јавниот живот од градот и ученици од Израел и Германија, со „Марш на животот“ одбележаа годишнина од депортацијата на битолските Евреи.

Во својот говор израелскиот министер за Ерусалим и за животна средина Зеф Елкин истакна дека е радосен што битолчани ја чуваат меморијата за Евреите и јавно се заблагодари за грижливо чување на културно историското минато и објекти на Евреите во овој град.

– Битола долги години беше топол дом на многу Евреи. Но, најладниот и најстрашниот ден во нивниот живот беше на 11 март 1943 година. На тој ден небото беше црно и ја навестуваше темнината… Голема беше неизвесноста на Евреите од Битола и од Македонија. Тешка беше судбината на Евреите во цела Европа, но за жал најтешкото се случи токму тука во Македонија – потсети министерот Елкин.

Тој нагласи дека се горди што се дел од возобновувањето на Еврејските гробишта во Битола, бидејќи тие за нив се значаен споменик.

Во маршот од еврејското маало по Широк Сокак до Железничката станица во Битола учествуваше и македонскиот министер задолжен за дијаспора Едмонд Адеми.

– Секоја година, и оваа, се потсетуваме на тешките денови и моменти од пред 76 години. Тоа зло никогаш да не се повтори. Македонски и албански семејства во тоа време помагаа колку што можеа да спасат граѓани од еврејската заедница и тие треба да се паметат за секогаш – рече меѓу другото министерот Адеми.

Домаќин на неколку дневните манифестации во Битола посветени на 76-годишнината од депортацијата на Евреите од овој град беше локалната самоуправа.

– Се сеќаваме на историскиот настан за да не се повтори, а нашите емоции за тој период обврзуваат да се мотивираме и да направиме нешто повеќе заедно со нашите пријатели од Израел – рече градоначалничката на Битола Наташа Петровска.

Програмските активности завршуваат вечер со светлосен настан „Патоказ кон помирувањето“ кој ќе се одржи на плоштадот „Магнолија“ и е во спомен на Еврејската заедница.