Антицрковниот речник ја открива намерата на српските владици

359

Се изгуби ли божјото слово во црковната реторика?

Токму преку писменото обраќање и ваквиот речник, аналитичарите ја откриваат намерата на некои од владиците во СПЦ, која тежнее кон присвојување на македонското духовно ткиво.
Речникот на омаловажување кон нашата држава и црква лесно се препознава во писмото преку користењето на термините „скопската шизматичка црква“, како и во користењето на референцата БЈРМ за Република Македонија, а не користење на
именката Македонија или придавката македонска, за Македонската православна црква

Многу политикантство, а малку духовност. Тоа го карактеризира речиси секој говор на српските великодостојници кога станува збор за прашањето на Македонската православна црква и признавањето на нејзината реалност, жива и посебна автокефална црква на македонскиот народ. Нема изјава во која владиците од црковен Белград не користат речник полн со омаловажувања, навреди и политички дисквалификации, небаре се квазилидери на политички партии, наспроти она што треба да бидат како вистински промотори на Христовата љубов, меѓусебното разбирање и почитта. Ништо што го означува православното учење не може да се пронајде, ако се анализира која било изјава, туку ќе се прочита само политикантство карактеристично за стереотипите на еден типичен балкански речник. Таков е случајот, според црковните аналитичари, и со последното писмо што српскиот патријарх Иринеј му го испратил на бугарскиот патријарх Неофит, наменето токму за црковниот проблем во Македонија, односно на предизвикот Бугарската црква да биде промотор на идејата поведена од МПЦ-ОА за признавање на нејзината автокефалност, а за возврат БПЦ да го добие статусот на нејзина мајка-црква.

Токму преку писменото обраќање и ваквиот речник, аналитичарите ја откриваат намерата на некои од владиците во СПЦ, која тежнее кон присвојување на македонското духовно ткиво. Речникот на омаловажување кон нашата држава и црква лесно се препознава во писмото преку користењето на термините „скопската шизматичка црква“, како и во користењето на референцата БЈРМ за Република Македонија, а не користење на именката Македонија или придавката македонска, за МПЦ.

Недоличен дискурс

Познавачите на црковните состојби велат дека ова е класичен антицрковен говор што српскиот патријарх го користи за да ја омаловажи МПЦ-ОА и да ѝ држи воспитни лекции на Бугарската црква.
Историчарот Драган Зајковски од Институтот за национална историја вели дека начинот на кој српскиот патријарх писмено му се обраќа на бугарскиот патријарх не е со соодветен речник што еден патријарх како духовник треба да го применува во изразувањето, особено во официјално писмено обраќање кон друг патријарх.
– Тие како духовници користат речник на бескрупулозни политичари, односно поаѓаат од позиција на надменост и исклучување на другиот, во случајот тоа го прави српскиот патријарх со МПЦ-ОА – додава историчарот Зајковски.
Според него, треба да се напомене дека писмото на српскиот патријарх содржи голема доза цинизам, нешто што во никој случај не може да биде говор на еден претставник на црквата како институција.

Држење лекции

Српскиот патријарх Иринеј отворено му се обраќа на бугарскиот патријарх Неофит велејќи му дека преземените чекори на БПЦ во однос на МПЦ-ОА можат негативно да се одразат на нивните заемни односи.
– Ваша светост би сакале со ова да Ве предупредиме дека поддршката на Бугарската православна црква за шизматиците од Поранешната Југословенска Република Македонија, под изговор дека тие ѝ се обраќаат на Бугарската патријаршија како на „своја мајка-црква“, може само да им наштети на односите на нашите две сестрински цркви и на единството на Православната екумена воопшто.

Затоа бараме од Вас да ја повлечете одлуката на Светиот синод на Вашата црква, за да не го принудите Светото собрание на епископи на нашата помесна црква да донесе одлука, која би имала невидени последици за идните односи на нашите две цркви.
Со надеж дека Вие, со полна свест за Вашата одговорност, ќе ја повлечете неканонската одлука Ви посакуваме секакво добро од воскреснатиот Господ – пишува во писмото потпишано од српскиот патријарх.
Во писмото, патријархот Иринеј ја ословува МПЦ-ОА со термините „шизматичка организација“, „скопска шизма“ и со ред други омаловажувачки термини.


Српски монах им противречи на грчките владици за македонскиот народ

Јеромонахот Петар Драгојловиќ, игумен на манастирот „Пиносава“ во шумадиската епархија на Српската православна црква, пред неколку месеци привлече внимание во македонската јавност со своето размислување и со критиката кон грчките владици за нивниот национализам искажан кон нашата држава за време на тогашните протести во Атина, каде што главните пароли беа испишани под мотото „Македонија е грчка“. На својот фејсбук-профил, јеромонахот напиша дека Македонија не е само грчка, а македонското име не е исклучива сопственост на Грците, како и дека никој нема право да им ги одзема името и јазикот на еден народ и на една држава.

Јеромонахот Петар можеби е единствениот во СПЦ што јавно кажал дека нема предрасуди и не ги негира постоењето на македонската држава, нација, јазик, како и правото државата да се идентификува како Македонија, а народот како македонски.


Патријархот Иринеј со политички речник и за Црна Гора

Потврда за тоа дека говорот на духовниците е политикантски е и неодамнешната изјава на српскиот патријарх Иринеј, во врска со Србите што живеат во Црна Гора, во која вели дека положбата на црквата во Црна Гора е полоша отколку во времето на османлиската окупација, а статусот на Србите е како во времето на озлогласената фашистичка творба на независната држава Хрватска.

Патријархот уште додава и дека ќе остане на оваа своја изјава, колку и да звучи негативно сѐ додека не добие ветување дека нема да добива закани дека ќе бидат одземени црквите и манастирите, како и дека ќе бидат протерани српските свештеници и монаси од Црна Гора.

Црногорскиот премиер Душко Марковиќ реагира на изјавата на патријархот оценувајќи ја како несоодветна и срамна за еден духовен лидер.