Фото: Игор Бансколиев

Во периодот од 28 февруари до 6 март регистрирани се 2.504 нови ковид-случаи, што е за 32,3 отсто пмалку во однос на претходната недела. Процентот на позитивност се движи од 9,4% до 18,4%, просечно 14,%.

Според неделниот извештај на Институтот за јавно здравје, тестирани се вкупно 17.416 материјали во лабораториите во кои се спроведува молекуларно тестирање и антигенско тестирање за присуство на САРС-ЦоВ-2, со намалување од 9,4% во однос на минатата недела.

Најголем дел од регистрираните случаи се од Скопје (н=1.418; 56,6%), а највисока неделна инциденца е регистрирана во Кавадарци – 389,4/100.000, Скопје – 312,7/100.000 и Демир Капија – 308,6/100.000.

Регистрирани се заболени лица во сите возрасни групи. Најзастапена е возрасната група над 60 години (н=705, 28,2%). Најмал број е регистриран кај возрасната група од 0-9 години (н=103; 4,1%).

Во однос на претходната недела, се забележи намалување на бројот на заболени кај сите возрасни групи, а најзабележително од 46,9% кај лицата до 9 години.

Согласно новиот алгоритам за оздравување во текот на минатата недела со статус „оздравени“ се стекнале 3.511 лица во хоспитализирани услови или на домашно лекување. Во текот на минатата недела вкупно се пријавени 372 реинфекции, со намалување за 31,5% во однос на претходната седмица.

Пријавени се 44 смртни случаи во 17 градови во текот на изминатата недела, за 35,3% помалку во однос на претходните седум дена. Најголем дел од нив се од Скопје (17). Во однос на возраста, најголем број (н=42; 95,5%) од починатите се над 60 години.
Хоспитализирани се 216 лица (35,9% помалку во споредба со претходна недела), од нив 150 се на кислородна поддршка (41,2% помалку во споредба со претходна недела), а 8 на инвазивна/неинвазивна механичка вентилација (11,1% помалку во споредба со претходна недела).

Заклучно со 5 март, вакцинирани се вкупно 871.082 лица со барем една доза на вакцина против ковид-19. Комплетно вакцинирани (со две дози) се вкупно 850.803 лица, а со трета доза се вакцинирани 144.391 лица.