Родители со деца, тинејџери, но и повозрасни излегоа на протест пред Собранието, поради новите рестрикции кои се воведуваат за намалување на бројот на заразени од коронавирус. Демонстрантите излегоа на улицата, а од мегафон беше повикано сите да ги извадат маските.
На ова еден од присутните реплицираше: „Имам право на глас, имам право на слобода. Никој не ми може ништо. Се е пропаганда“. Присутните на протестите, носеа транспаренти „Врати ми ја слободата, ќе ти го бутнам режимот“, „Заштити ја планетата“, „Мое тело божја сопственост“.
„Само Господ има право да не уништи, а не некој си 1 процент од светска елита. Тоа се психопати кои располагаат со цела планета, со ‘Гугл’, ‘Федерал банк’, ‘Фејсбук’. Не можат тие газди збогатени, не знаат што да прават, сега им е досадно, па ќе си играат играчки со популацијата која не е вредна за живеење. А ние со нормален, обичен, ограничен живот да ја изгубиме последната радост. Јас не ги обвинувам нашите политичари, тие се јадници, тие се графчиња. Ова не доаѓа од нив, туку од нивните босови, таа светска елита“, рече присутна на протестот која не се претстави.
„На Филипче што порака ќе му пратите?“, прашаа на мегафон, а останатите викаа:„Слобода, сакаме слобода“. „Доста е веќе.“
На протестот се гореа и заштитни маски, кои ги донесоа присутните. Освен транспаренти, имаше и знаме од Вергина, но и партиски маици. Демонстрантите кои излегоа на протестот се против вакцинирање и задолжителното поседување на сертификат за влез во угостителски објекти.
По ова, имаше и политички говори: „Ни ја продадоа државата, историјата, единствено што остана е нашата слобода“, рече лице кое се претстави како 20-годишник, па додаде: „Ни ги кршат човековите права, ова е битката меѓу доброто и злото. Ако присилно си се боцнете во раката, кармата ќе ве следи, кармата ќе се одлучи што ќе ви се случува. Ве молам разбудете се“.
И битолчани протестираа против вакцинацијата
На плоштадот „Магнолија“ во Битола вечерва се одржа мирен протест против, како што рекоа незадоволните граѓани, присилната вакцинација.
На протестот на кој учествуваа неколку стотини битолчани, демонстрантите со транспаренти го искажаа своето нездоволство од од рестриктивите мерки на Владата и забраните, поделбите на вакцинирани и невакцинирани граѓани.
По обраќањето на говорниците, незадоволните битолчани на плоштадот, одржаа протестен марш низ Широк Сокак. М.М.
