Османи: Навремена и добро таргетирана помош од Катар

498

Заменик претседателот на Владата задолжен за европски прашања, Бујар Османи, во улога на Национален координатор на странска помош во земјава, во присуство на Хамад Ал – Махмоод, вршител на должност Амбасадор на Државата Катар во земјава, на скопскиот аеродром ја пречекаа донацијата – помош за справување со ковид-19 од Катар.

Вицепремиерот Османи во името на Владата и од името на граѓаните, упати благодарност до вршителот на должност Амбасадор на Државата Катар во земјава, Хамад Ал- Махмоод, но и до народот на Катар за донираната помош за нашата земја.

– Се работи за голема количина, преку осум тони заштитна опрема која се состои од: близу петстотини илјади хируршки маски, околу 90 илјади трослојни медицински и хируршки маски, над 70 илјади заштитни маски N95;. Покрај маските, пакетот содржи и десетици илјади заштитни очила, заштитни шлемови, заштитни скафандери, заштитни ракавици – истакна Османи при што нагласи дека се работи за опрема која ни е потребна, која сериозно ќе ги зацврсти нашите капацитети особено во здравството и здравствениот систем, кои секако ја претставуваат првата линија на одбрана од коронавирусот.

– Обезбедувајќи ги овие донации од нашите меѓународни пријатели, обезбедуваме и сериозни заштеди во буџетот, што во време на соочување со економските предизвици од пандемијата е исто така многу важно – додаде Османи.

На примопредавањето на донацијата в.д. Амбасадотот на Државата Катар, Хамад Ал Махмоод нагласи дека денешната хуманитарна помош е донесена преку Катарскиот фонд за развој и во насока на поддршка на Владата на Република Северна Македонија во борбата против пандемијата ковид-19, притоа потенцирајќи дека нашата земја секогаш може да смета на помош и поддршка од државата Катар и изрази надеж дека оваа глобална пандемија наскоро ќе заврши.