Фото: Игор Бансколиев

Според министерот, се уште е рано да се зборува за укинување на ковид-сертификатите, зашто нивото на вакцинација на населението во земјава е многу помала во однос на другите земји

Болничките капацитети во земјава за ковид пациенти се исполнети околу 60 отсто. Ова попладнево за ТВ „Сител“ го изјави министерот за здравство Беким Сали, истовремено испраќајќи апел до граѓаните вакцинацијата да продолжи.

-Во постоечките болници исполнетоста е од 55 до 60 отсто, од аспект на кревети, што значи болниците се уште имаат капацитет за исполнување. Тоа се општите болници по градовите, Инфективната клиника и „8 Септември“. Сепак, преземаме мерки за подготвеност и за во текот на идната недела-изјави Сали.

Тој напомена дека навремено преземаат мерки за анализа на состојбата и за исполнетост на болниците. Додаде дека се уште сме далеку од потребата за именување на одредена клиника во ковид центар.

Посочи дека се уште е рано да се зборува за укинување на ковид-сертификатите, зашто нивото на вакцинација на населението во земјава е многу помала во однос на другите земји.

-Многу е важно да продолжи имунизацијата зашто досегашните резултати не ни покажуваат дека нашата популација е доволно имунизирана-изјави Сали.

Апелираше до граѓаните вакцинацијата да продолжи со цел, како што рече, да ги постигнеме барањата кои веќе се исполнуваат во други држави, а се релевантни барања и на почитувани професори или лица кои даваат јавни изјави и повици.

Напомена дека секоја одлука која се носи од Комисијата за заразни болести е релеванта и дефинитивна, а секоја друга одлука, изјава на поединци е врз основа на некои анализи во странство, но не за околностите во нашата држава.

Најави дека наскоро ќе има надградување, проширување на Комисијата за заразни болести со квалитетни кадри, но не соопшти нови имиња.