Најдобриот светски тенисер, Новак Ѓоковиќ, и неговата сопруга Јелена донираа еден милион евра за купување респиратори и медицинска опрема за борба против коронавирусот во Србија.

Ѓоковиќ преку видеоразговор со српските новинари рече дека опремата ќе биде набавена од Кина и Германија.

– Прво на сите, голема благодарност до медицинскиот персонал, кој со денови се бори за здравјето на луѓето низ целиот свет и напорно работи на помагање на заразените. Бројот на пациенти се зголемува секој ден, а со тоа и Јелена и јас и нашата Фондација решивме да собереме што е можно повеќе информации за да утврдиме кој е најдобриот начин за донирање на нашите ресурси, пари и знаење, за да може оваа помош најсоодветно да влијае на здравјето во цела Србија – рече Ѓоковиќ.

Тој особено им се заблагодари на државните власти кои му помогнаа да ја спроведе донацијата, како и на Кина за нивната голема помош на Србија.