Во над 90 проценти од земјите, основните здравствени услуги се нарушени поради пандемијата од ковид-19, се вели во студија која денеска ја објави Светската здравствена организација (СЗО).
Влијанието на пандемијата на Ковид-19 врз основните здравствени услуги предизвикува голема загриженост, се наведува во студијата, објави „Ројтерс“.
Големите здравствени придобивки постигнати во последните две децении може да се збришат за краток временски период, предупредува истражувањето.
Во него биле вклучени податоци земени од мај до јули во повеќе од 100 земји.
Меѓу најпогодените здравствени услуги се рутинските имунизации со 70 проценти, планирањето на семејство со 68 проценти и дијагностицирањето и лекувањето на карцином со 55 проценти, додека работата на службите за итни случаи е забавена и загрозена во скоро четвртина од земјите.
Најсилно е погоден регионот во источниот Медитеран, кој ги вклучува Авганистан, Сирија и Јемен, потоа следат Африка и регионот на југоисточна Азија, додека американскиот континент не бил дел од студијата.
Истражувањето на СЗО наведува дека е разумно да се претпостави оти дури и умерено нарушување на основните здравствени услуги може да доведе до зголемување на смртноста од други причини, покрај ковид-19, на краток до среден и долг рок.
