Рускиот претседател, Владимир Путин, изјави дека Русија треба да ја забрза кампањата за вакцинација против Kовид-19.

Русија забележа најмногу смртни случаи од оваа болест во еден ден од почетокот на пандемијата.

Обраќајќи им се на новоизбраните пратеници, Путин апелираше до нив активно да ги поддржат напорите за вакцинирање на мнозинството од населението.

„Вакцинацијата ги штити луѓето од зараза, од сериозни симптоми. Треба да го забрзаме нејзиното темпо“, рече Путин пред пратениците.

Русија брзо ја разви и почна да ја користи вакцината „Спутник В“ кога коронавирусот започна да се шири минатата година, но темпото на вакцинација во Русија е бавно.

Премиерот Михаил Мишустин претходно изјави дека околу една третина од населението е вакцинирано.

Русија денеска регистрираше 973 смртни случаи, што е најголем број за еден ден од почетокот на пандемијата, како и 28.190 нови случаи на зараза.