Аргентинскиот претседател, Алберто Фернандез, изјави дека ќе ги заостри карантинските мерки во Буенос Аирес и периферијата од 1 јули поради зголемениот број случаи на заболени од коронавирус.
– Повторно ќе ја затвориме пошироката област на Буенос Аирес за да го намалиме ширењето на вирусот – рече Фернандез, додавајќи дека од 1 јули граѓаните на таа област повторно ќе бидат ставени во карантин, а ќе им биде дозволено да излезат само по намирници.
Карантинот ќе биде на сила до 17 јули.
Карантинот беше воведен во главниот град на Аргентина на 20 март, а рестриктивните мерки постепено се олеснуваат во последните неколку недели.
Во Аргентина, со околу 44 милиони жители, бројот на заразени е 52.444, додека од вирусот починале 1.167 лица.
Фернандез рече дека Буенос Аирес со својата периферија, каде живеат 14 милиони жители, останува најзагрозената област.
