Мексиканскиот претседател позитивен на коронавирус, од дома ќе разговара со Путин

35

Мексиканскиот претседател Андрес Мануел Лопез Обрадор (67) соопшти дека е позитивен на коронавирус.

Тој на Твитер напиша дека има лесни симптоми и е оптимист, како и дека ќе продолжи да работи од дома. Како што рече, тој ќе има разговор од дома со рускиот претседател Владимир Путин за набавка на руската вакцина „спутник 5“.

Лопез Обрадор минатата година изјави дека ќе набави 12 милиони дози руска вакцина, доколку се покаже дека е ефикасна против вирусот.

Засега Мексико не одобри употреба на руска вакцина, но официјалните лица сакаат да ја прошират програмата за вакцинација за 128 милиони жители поради доцнењето во испораката на вакцините од страна на компаниите „Фајзер-Бионтек“.