Специјалниот претставник на Светската здравствена организација (СЗО) за ковид-19 предвиде трет бран пандемија во Европа на почетокот на 2021 година, ако владите го повторат неуспехот со спречување на вирусот.

– Тие не ја изградија потребната инфраструктура во текот на летните месеци, откако го ставија под контрола првиот бран на зараза. Сега имаме втор бран. Ако тие не ја изградат потребната инфраструктура, ќе имаме трет бран на почетокот на следната година – рече претставникот на СЗО, Давид Набаро, во интервју за швајцарските медиуми.

Европа накратко имаше пад на стапката на зараза и сега се прошири повторно. Германија и Франција вчера забележаа зголемување на случаите за 33.000, Швајцарија и Австрија имаат илјадници случаи на ден, додека Турција објави рекордни нови 5.532 случаи.

Набаро го издвои потегот на Швајцарија да дозволи скијање – со задолжително носење маски во жичниците – додека другите алпски земји ги затворија ски-центрите. Набаро рече дека Швајцарија може да достигне „многу високо ниво на болни и починати“.

– Штом стапките на зараза исчезнат, тогаш можеме да бидеме слободни колку што сакаме Но, сега? Треба ли да се отворат ски-центрите? Под кои услови? – праша тој.

Набаро ги пофали одговорите на азиските земји како Јужна Кореја, каде стапката на зараза е релативно ниска.

– Луѓето се целосно ангажирани, тие прифатија однесување што го отежнува ширењето на вирусот. Тие одржуваат растојание, носат маски, се изолираат кога се болни, ги мијат рацете и лицето. Тие ги штитат најранливите групи – рече тој.