Осудениот бизнисмен Сеад Кочан утрово го примил решението со кое се упатува на издржување на затворската казна, но тој не дошол во затворот во Идризово, според информациите во повеќе македонски медиуми.

Кочан вчера доби задолжување да се јави во затвор, откако Кривичниот совет при Основниот кривичен суд – Скопје, вчера, ја отфрли неговата жалба со која бараше одлагање на затворската казна.

Според неофицијални информации, бизнисменот се наоѓа на лекување во приватна болница.

Тој требаше да се јави во затворот „Идризово“ на издржување на затворската казна од четири години и осум месеци за случајот „Труст“, на 17 јули, но поднесе барање за одлагање на казната поради здравствени проблеми. Барањето беше одбиено од судот.

Доколку Кочан не се јави во затворот, полицијата на барање на судот ќе треба да го спроведен на издржување на затворската казна.