Трофеите го докажаа квалитетот на оспоруваниот творец на успехот на Реал

986

Освојувањето на фудбалската Лига на шампионите (ЛШ) третпат едноподруго, на Реал Мадрид, ќе се памети по спектакуларниот гол на Герет Бејл со ножички во финалето и по извонредната голгетерска форма на Кристијано Роналдо низ натпреварувањето (постигна 15 погодоци), додека творецот на досега незабележаниот успех на „кралевите“, веројатно повторно ќе биде неправедно запоставен.

Таков е случајот со тренерот на Реал, Зинедин Зидан, кој е во сенка на ѕвездите на најтрофејниот европски клуб, и кој постојано се соочува со недовербата и со негативните критики од навивачите и од медиумите, кои се сомневаат во неговите способности.

– Јас не сум најдобриот тренер и постојано ќе го кажувам тоа. Не сум најдобриот тренер кога во прашање е тактиката. Бидејќи вие постојано го велите тоа – им кажа низ смеа францускиот стратег на новинарите, во пресрет на финалето.

Но, Зидан е меѓу најзаслужните за победата на Реал над Ливерпул од 3-1 во вечерашното финале во Киев, по кое Шпанците станаа прваци на Европа по 13-ти пат.

Тој погоди со уфрлањето на Герет Бејл во игра, во 60-та минута, на местото на Иско, по што Велшанецот ги постигна двата решавачки погодоци, со ножички во 64-та и со удар од далечина во 83-та минута. Претходно Карим Бензема го отвори резултатот во 51-та минута, по грешка на противничкиот голман Лорис Кариус кој имаше слабо издание, а Садио Мане изедначи за Ливерпул во 55-та минута. Ливерпул остана без својот најдобар фудбалер Мохамед Салах во 31-та минута, кога одличниот крилен напаѓач го напушти теренот поради повреда, по дуел со Серхио Рамос.

А тренерските успеси на популарниот Зизу го докажуваат неговиот квалитет, бидејќи тој за безмалку две и пол години на клупата на Реал, ја освои ЛШ трипати, исто колку и најтрофејниот досега, Карло Анчелоти, на кого му беше помошник во кралскиот клуб, додека има еден трофеј повеќе од, на пример, славните сер Алекс Фергусон, Жозе Мурињо и Пеп Гвардиола. Згора, Зидан е првиот тренер што дојде до трофејот трипати едноподруго.  

Магазинот „И-ес-пи-ен“ се пошегува во описот на тренерските способности на  Французинот, пишувајќи, „Зинедин Зидан не е познат по тактиката, ниту по стилот, само по способноста да победува“.

Рекордите и новиот успех, би требале на Зидан да му ги донесат славата и признавањето на квалитетот што ги заслужува. М.Ж.