Протестите од САД се проширија во цел свет

177

Европејците се приклучија на протестите против расизмот што се шират низ САД, а кои почнаа по убиството на невооружениот Афроамериканец Џорџ Флојд при полициско апсење. Ширум САД мирните протести преминаа во насилство.

Околу 3.000 луѓе, според мадридската полиција, денеска се собрале пред амбасадата на САД, а во рацете држеле знаци „Не можам да дишам“, по зборовите на убиениот 46-годишен црнец Џорџ Флојд во Минеаполис пред речиси две недели.

Во Рим, на Пјаца дел Пополо, илјадници млади клекнале во тишина со кренати тупаници девет минути, колку што полицаецот со коленото го притискал Флојд на вратот сè додека не починал.

Во Копенхаген, околу 5.000 луѓе, излегле протест пред американската амбасада во областа Остербро, објави данското радио ДР.

Неколку илјади луѓе се собрале во Лозана, Швајцарија во знак на протест против расизмот и покрај мерките за заштита од ковид-19 со кои се забранува собирање на повеќе од 300 луѓе во земјата.

Протести одржаа и во Германија и Холандија, а за денеска закажани се протести во Брисел, Глазгов и Лондон, каде вчера првично мирен протест ескалираше во конфликт.

Гневот поради смртта на Флојд се шири низ целата планета.

Вчера имаше протести од Австралија до Тунис, при што демонстрантите го истакнуваа расизмот во своите татковини.

Во Јапонија, на протест против расизмот се собрале околу 700 луѓе.

Во Тајланд, каде што е забранет антирасистички протест, повеќе од 200 луѓе учествуваа на виртуелна манифестација водена од „Прашања за животот на црнците (Животот на црнците вреди“), пишува „Ројтерс“.