Фото: Маја Јаневска-Илиева

Дополнителни 438 невработени лица ќе бидат опфатени со мерката за субвенционирање на плати преку Оперативниот план на активни програми и мерки за вработување и услуги на пазарот на трудот. Владата на последната седница, преку пренамена на средства во Оперативниот план во износ од 100 милиони денари обезбеди поголем опфат на невработени лица.

Со овој вид на поддршка бројот на невработени лица, што ќе бидат опфатени со мерката субвенционирање на плати, од 866 ќе се зголеми на 1.304. На тој начин, вкупниот опфат на невработени лица со Оперативниот план ќе се зголеми од 10.279 на 10.717 лица, посочуваат од Министерството за труд и социјална политика.

Додаваат дека со Оперативниот план за активни програми и мерки за вработување и услуги на пазарот на трудот за 2021 година, се утврдуваат програмите, мерките и услугите за вработување кои ќе обезбедат создавање на нови работни места, поддршка за креирање на нови работни места и зголемување на вработливоста на невработените лица, посебно на младите, долгорочно невработените и корисниците на гарантирана минимална помош, како и поддршка на невработените лица на кои престанокот од работен однос е регистриран во периодот на кризата предизвикана поради коронавирусот.

За прв пат оваа година, како што истакнуваат од ресорното министерство, во Оперативниот план се предвидени три принципи, според кои приоритет се дава на лицата кои ја изгубиле работата поради пандемијата со ковид-19, потоа принципот на диверзитет и инклузивност и принципот на рамномерен регионален развој.