Натпросечните температури што ја зафатија земјава предизвикаа шок кај земјоделските култури. Според агрометеоролозите, дехидрира зрното кај пченицата, која ја немаше постигнато целосната зрелост, а енормно се зголеми и потребата од вода за одржување на вегетацијата кај преостанатите култури.
Сепак ваквите временски услови беа оптимални и овозможија непречена жетва на јачменот, која е во полн ек.
– Се очекува мала промена на временската состојба, со благ пад на дневните температури, што би се одразило позитивно кај културите, а в понеделник со условите за повремен локален дожд, уште повеќе ќе се релаксира состојбата, особено во реоните каде што врнежите би биле забележани. Во втората половина од седмицата се очекува повторно постепено покачување на температурите, кои не треба да го надминат 38-от степен, без врнежи, па затоа препорака е да се почне и со жетвата на пченицата, секаде каде што е можно – нагласуваат агрометеоролозите од УХМР.
Потребата од вода за пролетните окопни култури или градинарските култури останува главен приоритет, при што неопходни се наводнувања и целосно активирање на системите за таа намена.
– Високите температури на воздухот предизвикуваат и предизвикаа предвремено зреење на сезонските видови овошки, со што нивото на шеќерните единици е намалено. Ваквите временски услови воопшто не му одат во прилог и на пчеларството, кое и оваа година е во многу незавидна состојба и ќе резултира со многу ниски приноси – предупредуваат агрометеорлозите.
