Новата министерка за финансии, Нина Ангеловска, денеска го презема управувањето со Министерството.

Ангеловска веќе оствари средба со заменик министерката за финансии, Ширет Елези и државниот секретар Јулијана Петановска, на која беа дискутирани тековните активности на министерството.

Таа на позицијата министер за финансии доаѓа од приватниот сектор.

Основач е на „Групер“ – компанија за е-трговија. Ангеловска докторирала менаџмент на Економскиот факултет во Скопје. Има бројни домашни и странски признанија. Германскиот магазин „Д Хундрет“ ја вбројува во листата на 100 успешни жени основачи на старт-апи, а магазинот „Форбс“ ја наградува со признанието „30 под 30“ за Европа во категоријата малопродажба и е-трговија.

Во 2017 година Ангеловска иницира основање на првата Асоцијација за е-трговија и станува нејзин претседател. Од 2018 година Ангеловска е член на УО на Европската аоцијација за е-трговија ЕМОТА. Во 2019 таа станува и член на УО на Стопанската комора на Македонија.

Ангеловска неодамна истакна дека како министерка ќе се вложува во проекти кои ќе донесат економски раст и ќе ја намалат невработеноста. Таа посочи дека Министерството го очекува амбициозна агенда и реформи, како мерката за стимулирање на растот на платите, која е предвидена со претстојаниот ребаланс на буџетот.