Ќе се гради нов влез од автопатот во Гевгелија

233

Градоначалникот на Општина Гевгелија Сашо Поцков за годинава најави дека ќе се стави во употреба стариот влез од автопатот „Пријателство“ во Гевгелија, што се наоѓа во близина на селото Мрзенци.

-Ова ќе создаде можност да се реконструира и патот што во продолжение поминува покрај старата бензинска пумпа на „Макпетрол“, мотелот „Вардар“, локалитетот „Милци“, каде се предвидува градење на мултинаменски трговски центар, а завршува на граничниот премин Богородица, рече Поцков.

Патот оди паралелно со автопатот „Пријателство“ и претставува дел од некогашниот автопат „Братство и единство“, а на овој проект, како што истакна Поцков, ќе се инсистира со цел повторно да заживее овој дел од градот.

Поцков очекува проектот да биде дел од проектите за изградба и реконструкција на локални патишта, за кои Министерството за транспорт и врски годинава ќе издвои 50 милиони евра, поради што му наложи на одделението за урбанизам да подготви план и за овој пат за што финансиски се подготвени да учествуваат и фирмите кои се наоѓаат во тој дел од градот.