Уапсен шефот на Нисан

678

Јапонскиот производител на автомобили Нисан Мотор објави дека интерната истрага покажала дека директорот на компанијата Карлос Госн прикажувал помал доход од вистинскиот и преземал други незаконски дејства.

Како што јавуваат јапонските медиуми, тој бил уапсен.

Госн, кој ја врши должноста претседател на партнерството меѓу Нисан, Рено и Мицибуши Моторс, е уапсен под сомнение за кршење на финансискиот закон, објавија јапонските медиуми.

Поради ваквите информации, цените на акциите на партнерот на Нисан и главен акционер, Рено, каде што Госн ја врши функцијата претседател на управата извршен директор, утрово забележаа голем пад. На берзата Еуронекст само претпладнево акциите ослабеа за повеќе од 12 отсто.

Од Нисан соопштуваат дека Госн и директорот Грег Кели во извештаите поднесени до берзата во Токио искажувале помали износи на бонусите и додатоците на плата од вистинските, за да се намали објавениот износ на надоместоците што ги прима Карлос Госн.

Понатаму од компанијата додаваат дека се откриени и редица други крупни незаконски дејства на Госн, како користење пари на компанијата за лични потреби, а потврдена е и значителна вмешаност на Грег Кели.

Во Нисан со месеци водеа интерна истрага откако од свиркачи добија дојава за неправилности.