Отворена турската фабрика „Чагатај Кабло“ во Бунарџик

170

Шест милиони евра инвестиција и вработување на околу 300 лица треба да биде билансот од инвестицијата во најновата турска фабрика во Македонија „Чагатај Кабло“ што вчера и официјално почна со работа.Ж

Станува збор за погон од седум илјади квадратни метри, лоциран во индустриската зона „Бунарџик“. За негова изградба во првата фаза се вложени четири милиони евра и досега се вработени 80 лица.

„Чагатај Кабло“ произведува кабли за автомобилската индустрија и за земјоделска механизација и извезува во светски рамки.

– Ова е пример дека дадениот збор има тежина, а ветувањата дадени пред граѓаните се исполнуваат – вели директорот на Дирекцијата на ТИРЗ Александар Младеновски пред отворањето на погонот.

Како што истакна сопственикот на фабриката, Ахмет Короглу, компанијата донела одлука да инвестира во Македонија во 2006 година, лани ги поставила темелите, а годинава почнува со производство.

– Во втората фаза предвидуваме инвестицијата да достигне шест милиони евра, погонот да изнесува 10 илјади квадратни метри, а бројот на вработени да биде 300 – нагласи Короглу.

Според вицепремиерот Кочо Анѓушев, „Чагатај Кабло“ е првата фабрика што се отвора по донесувањето на новиот закон со кој се изедначуваат условите за домашните и за странските вложувачи.

– Празник е секогаш кога зборувате за нова фабрика и за почеток на ново производство – истакнува Анѓушев и најави дека во наредниот период скоро секоја недела ќе се пушта по еден нов капацитет или ќе почнува ново производство.
Вицепремиерот подвлече дека оваа влада изминатиов период успеала да донесе 16 странски компании и сите тие планираат инвестиции во земјава.

– Официјалниот почеток со работа на „Чагатај Кабло“ за мене претставува резултат на стабилните и предвидливи владини политики. Оваа влада, наместо со договори во четири очи, со закон ја испланира и ја реализира поддршката за новите странски и домашни инвестиции – рече министерот за економија Крешник Бектеши.
Турската компанија „Чагатај Кабло“ е, меѓу другото, позната и како доставувач на белгискиот производител на автобуси „Ван Хол“, кој е веќе присутен во „Бунарџик“. Е.Р.