„Макканабис“ бара законот за канабис да биде донесен пред распишување на избори

196

Апел до трите најголеми политички партии во Македонија за итно носење на измените во Законот за контрола на опојни дроги и психотропни супстанции, денеска упати здружението на производителите на медицински канабис „Макканабис“.

Од „Макканабис“ побараа законот, што е доставен до Собранието, да се донесе пред распишување на изборите, односно да биде донесен по скратена постапка, со цел да биде изгласан на наредната седница.

– Апелирам до сите партии, а најмногу до трите најголеми партии во земјава СДСМ, ВМРО-ДПМНЕ и до ДУИ, здружено да се донесе овој закон пред да се распишат предвремени парламентарни избори – кажа претседателот на здружението „Макканабис“, Костадин Дуковски, на прес-конференција.

Дуковски апелираше евентуалните забелешки што пратениците ќе ги дадат на законот да бидат конструктивни. Тој посочи и дека со одолговлекувањето на донесување на законот, губат сите кои инвестирале во овој бизнис, а најмногу, како што рече, губи државата. Претседателот на здружението „Макканабис“ истакна дека се прифатени нивните барања и гаранцијата сега е смалена на 300 илјади.