Атанасов: Нема отштета за угинати свињи од нерегистрирани фарми

52

Селските домаќинства што одгледуваат свињи за сопствена употреба, да ги заколат или да ги понудат за откуп на месната индустрија ако немаат воведено или ако биосигурносните мерки им се на многу ниско ниво. Со ваков апел денеска излегоа од Агенцијата за храна и ветеринарство (АХВ) за спречување евентуална појава и ширење на африканската свинска чума во земјава.

– Како одговорна институција, ги информираме одгледувачите на свињи дека во услови на сериозна епизоотиолошка состојба во соседството и постоењето реална опасност од пренесување и ширење на болеста, сега не е време за ваков начин на одгледување свињи. Во согласност со законските и подзаконските нормативи, АХВ нема да врши исплата на отштета на одгледувачите чие одгледувалиште не е регистрирано во агенцијата, а чии свињи ќе угинат од оваа болест – вели директорот на агенцијата, Зоран Атанасов.

Отштета ќе добијат само регистрираните сточари, кои ги имаат имплементирано биосигурносните мерки на фармите и чии евентуално заразени грла ќе бидат убиени и нештетно уништени од страна на надлежните органи.

– Воведувањето на биосигурносните мерки на свињарските фарми е законска обврска и одговорност на одгледувачите. Нивното невоведување, неодржување и непочитување може да предизвика појава и ширење на заразни болести кај животните. Африканската свинска чума не е опасна за луѓето, иако тие можат да бидат еден од преносителите на вирусот преку заразената облека или алати со кои работат. Болеста предизвикува огромни економски штети во свињарството, бидејќи смртноста кај домашните свињи се движи и до 100 проценти. За неа не постојат ниту вакцина, ниту лек. Извор на вирусот на оваа опасна болест, која ги погодува домашните и дивите свињи, се заразените, болните или угинати животни, заразената храна и отпадоци од храна, опрема, возила, облека и мекиот крлеж како биолошки преносител на болеста – нагласува Атанасов.

Африканска свинска чума, освен во Бугарија, од завчера е потврдена и во Србија. Ја има и во уште дваесетина други земји, а се шири и зема сѐ поголеми размери.
Од вчера во земјава почна вонредниот отстрел на диви свињи, како една од превентивните мерки што подолго време интензивно се реализираат.