Анѓушев: Бруто домашниот производ продолжува со раст

123

Вицепремиерот задолжен за економски прашања, Кочо Анѓушев, денес, на прес конференција, ги презентираше најновите податоци соопштени од Државниот завод за статистика кои се однесуваат на растот на бруто домашниот производ и на намалување на невработеноста.

Тој потенцираше дека во вториот квартал на 2019 година, продолжи растот на бруто домашниот производ, пред се како резултат на развојот на реалната економија и без интервенции на државата.

– Растот на бруто домашниот производ во вториот квартал на 2019 година е уште на високи 3,1отсто, коишто практично и се очекувани и заедно со растот од првиот квартал од 4,1отсто, тоа е просечно раст од 3,6% во првата половина на годината, што е над предвидувањата и во буџетот којшто на почетокот беше детерминиран на 3,2 отсто, а потоа со ребалансот е корегиран на годишен раст од 3,5 отсто – нагласи вицепремиерот Анѓушев.

Осврнувајќи се на состојбите на пазарот на трудот Анѓушев потенцира дека ДЗС забележа нова рекодно ниска стапка на невработеност од 17,5 отсто.

– Сакам само да потсетам дека невработеноста во вториот квартал на 2017 година беше 22,6 отсто, или ако сакаме во апсолутни бројки да кажеме во тој период од 2 години се вработени 54.391 лице. Од тие, само во вториот квартал на 2019 година вработени се 4869 лица и оттука е падот од 17,8 отсто на 17,5 отсто – појасни Анѓушев.

Индустријата, земјоделството, градежиштвото и трговијата се главните столбови на бруто домашниот производ и сите бележат раст во вториот квартал на 2019 година, кажа Анѓушев на прес конференцијата.

– Индустриското производство исто така е пораснато. Ако земеме само за месец јули, во споредба со истиот месец 2018 година тоа е пораснато за 5,8 отсто или ако земеме кумулативно за период од 1 до 7 месец 2019 година споредбено со истиот период лани бележиме раст од 4,9 отсто. Главните генератори на растот на економијата во нашата држава сеуште се индустријата, градежништвото, земјоделството и како резултат на овие гранки и трговијата. Јасно е дека стандардот се зголемува со оглед на покачувањето на нето платите за ефективни 10 отсто во последните две години, со тоа се зголемува јавната потрошувачка, а воедно се зголемуваат бруто инвестициите – заврши вицепремиерот Анѓушев.