среда, 10 јули 2013, 13:24

Скопје

Првиот вештачки земјотрес во Ново Лисиче

Вештачки земјотрес од 5,5 степени според Европската сеизмичка скала денеска во Ново Лисиче беше симулиран врз десеткатница во станбената населба на Адора Инженеринг изведен од Институтот за земјотресно инженерство и инженерска сеизмологија од Скопје (ИЗИИС), пренесува МИА

Со два вибратора од типот ГСВ- 101 беше генерирана серија на синусоидални побуди со сила од по 1.5 тона кои генерираат околу 100 тона хоризонтална сила, појасни директорот на ИЗИИС Михаил Галевски.
 
- Објектот е инструментиран во 100 мерни точки на кои   се поставени најпрецизни инструменти за мерење на забрзување. Собирањето и обработката на податоци се врши во реално време со што може да се набљудува тродимензионалното вибрирање на зградата, рече Галевски.
 
Градоначалникот на град Скопје, Коце Трајановски го поздрави потегот на Адора и ИЗИИС кој е организиран во пресрет на одбележувањето на 50 години од скопскиот земјотрес.
 
- Ваквите проби се за поздравување и ние како Град Скопје ги поддржуваме, а тоа   ни докажува дека зградите што се градат се сеизмички стабилни, изјави Трајановски.
 
Ова мерење е прво од осамостојувањето на Македонија. Кон крајот на 90-тите кај нас се направени мерења со предизвикување на вештачки синусоидални товари на повеќе важни објекти како што е МРТВ, училиштето „Песталоци“ и на некои поважни брани.
сподели на пинг
Веста е прочитана: 233
  Powered by Dejan Jovanovski